消失的广州传统手艺人：骟鸡佬

新闻讲：记者走访发现，广州一些传统的手艺工种行将消失。

阿六讲：新闻中讲嘅系“行将”，而广州早就消失嘅手艺工种其实唔少，骟鸡就系其中一种。

骟鸡即阉鸡，系粤语叫法。以前，广州各家各户都会养鸡自食。而鸡中嘅生鸡（即公鸡）因为天生好性、好斗，并且很“咸湿”，经常性侵鸡乸，所以好难生肉，长期瘦孟孟，于是，大家就谂出一个办法——骟咗佢。呢招又真系几灵，生鸡变成骟鸡后既冇杂念又够温顺，专心生肉，唔使几耐就肥狮大只。

因为骟鸡系一种专业手艺，所以就有咗骟鸡呢个行当。

以前做骟鸡嘅都系男人，大家叫“骟鸡佬”。佢哋嘅架撑有五样：笠网、刀仔、铜线、遮，走街穿巷喺度嗌“骟——鸡”，有需要嘅街坊就会带佢指认自己嘅生鸡，骟鸡佬就用笠网将鸡笠住，然后就打开把遮遮住（因为场面有啲血腥），跟住就落刀，再用铜线圈住生鸡嘅鸡子一拉，之后搣撮鸡毛封住个伤口——搞掂。

骟鸡佬骟鸡多数系唔收钱嘅，报酬就系鸡子归佢（据讲系可以卖俾人浸酒），所以呢行好受欢迎。

后嚟，因为城市禁止养鸡，再加上养鸡技术嘅进步，骟鸡呢行就消失咗。不过，宜家谂番转头，骟鸡其实几残忍，唔讲人道，哦。唔系，系唔讲鸡道，都系消失好啲。

(原标题：消失嘅骟鸡佬）